Sekretari i Përgjithshëm i NATO-s, Mark Rutte, konfirmoi se samiti i ardhshëm i Aleancës do të mbahet në Shqipëri.
Deklarata u bë në përfundim të Samitit të NATO-s në Ankara, gjatë konferencës për mediet, ku Rutte iu përgjigj interesimit të gazetarëve për vendin mikpritës të takimit të ardhshëm të nivelit të lartë.
“Samiti i ardhshëm i NATO-s do të jetë në Shqipëri. Ky është vendimi i marrë në Hagë dhe i rikonfirmuar në Ankara. Tashmë do të përcaktojmë edhe datën e saktë të zhvillimit të tij”, u shpreh Rutte.
Konfirmimi i kreut të NATO-s i jep fund spekulimeve mbi vendin organizator të samitit të ardhshëm dhe përfaqëson një vlerësim për rolin e Shqipërisë brenda Aleancës.
Samiti i mbajtur në Ankara mblodhi liderët e vendeve anëtare të NATO-s, të cilët diskutuan mbi forcimin e sigurisë euroatlantike, rritjen e shpenzimeve për mbrojtjen, modernizimin e kapaciteteve ushtarake dhe koordinimin e politikave të sigurisë përballë sfidave aktuale.