Gjykata e Posaçme kundër Korrupsionit dhe Krimit të Organizuar (GJKKO) ka shpallur fajtorë dhe dënuar me gjithsej 17 vite e 8 muaj burg vëllezërit Flori dhe Fredi Pali, të akuzuar për drejtim dhe pjesëmarrje në një grup të strukturuar kriminal që operonte në Shqipëri dhe Norvegji, me veprimtari në fushën e trafikut të drogës dhe pastrimit të parave.
Sipas vendimit të GJKKO-së:
Flori Pali është dënuar me 11 vite burg, pas përfitimit të uljes me 1/3 për shkak të gjykimit të shkurtuar. Ai u shpall fajtor për trafik ndërkombëtar droge, prodhim dhe shitje narkotikësh, pastrim parash dhe drejtim të një grupi kriminal. Ai kishte drejtuar shpërndarjen e të paktën 4 kg kokainë dhe 10 kg marijuanë në Stavanger të Norvegjisë, dhe kishte organizuar transferimin dhe menaxhimin e të ardhurave të paligjshme në Shqipëri.
Fredi Pali, vëllai i tij, u dënua me 6 vite e 8 muaj burg, po ashtu me ulje dënimi. Ai kishte ndihmuar në fshehjen dhe menaxhimin e parave të trafikut të dërguara nga Norvegjia në Shqipëri, duke kontribuar në ciklin e pastrimit të të ardhurave kriminale.
Anita Adilaj, bashkëpunëtore e grupit, u dënua me 6 vite e 8 muaj burg me vendim të formës së prerë, për rolin e saj si financiere dhe llogaritare e rrjetit kriminal. Ajo kishte bashkëpunuar ngushtë me të dënuarin në Norvegji, Halit Xhini, në dërgimin e të ardhurave të drogës drejt Shqipërisë.
Hetimet, të nisura në vitin 2019, u zhvilluan në bashkëpunim me autoritetet norvegjeze dhe zbuluan një rrjet kriminal të mirëorganizuar, që vepronte përmes dërgesave me para “cash” apo nëpërmjet kompanive financiare.
GJKKO ka vendosur gjithashtu konfiskimin e disa pasurive, përfshirë dy apartamente në Tiranë, një truall në Ishull Shëngjin, automjete dhe celularë, të cilat rezultuan në pronësi ose zotërim të tërthortë të anëtarëve të grupit.
Grupi kriminal kishte si qendër operacionale qytetin e Stavangerit në Norvegji, dhe ishte i përbërë kryesisht nga shtetas shqiptarë, disa prej të cilëve tashmë janë dënuar edhe nga autoritetet norvegjeze.