Britania e Madhe ka dëbuar një diplomat rus, në një veprim reciprok ndaj Moskës, pas dëbimit muajin e kaluar të një diplomati britanik nga Rusia, i cili u akuzua për spiunazh nga autoritetet ruse.
Ministria e Jashtme britanike i ka cilësuar akuzat e Rusisë si “të pabaza”, ndërsa dëbimin e diplomatit britanik e ka përshkruar si një akt “të paprovokuar dhe të pajustifikuar”. Sipas një zëdhënësi të Foreign Office, diplomati britanik u akuzua padrejtësisht si anëtar i shërbimeve sekrete, pa pasur një deklarim të tillë zyrtar.
“Duke thirrur ambasadorin rus, një zyrtar i lartë i Ministrisë së Jashtme bëri të qartë se Mbretëria e Bashkuar nuk do të tolerojë frikësimin e stafit të ambasadës britanike. Për këtë arsye, sot po ndërmarrim veprimet përkatëse, duke hequr akreditimin e një diplomati rus,” deklaroi zëdhënësi.
Në sfondin e luftës në Ukrainë, Rusia dhe vendet perëndimore kanë akuzuar vazhdimisht njëra-tjetrën për aktivitete spiunazhi, me një intensitet që, sipas diplomatëve, nuk është parë që nga periudha e Luftës së Ftohtë. Diplomatë perëndimorë në Moskë kanë raportuar se janë subjekt i mbikëqyrjes ndërhyrëse dhe ngacmimeve të vazhdueshme.
Britania e Madhe ka paralajmëruar Rusinë që të mos vijojë me këtë qasje ndaj diplomatëve të saj. “Çdo veprim i mëtejshëm nga ana e Rusisë do të konsiderohet përshkallëzim dhe do të marrë përgjigjen e duhur,” shtoi zëdhënësi. Ambasada ruse në Londër nuk ka reaguar ende ndaj kërkesës për koment nga agjencia Reuters.