KSAMIL– Njësia Policore Detare dhe Policia Kufitare kanë vijuar monitorimi intensiv i hapësirave ujore në vend
me qëllim rritjen e sigurisë për pushuesit dhe drejtuesit e mjeteve lundruese. Këtë fundjavë në zonën që shtrihet nga Komani në Ksamil, janë kontrolluar 321 mjete lundruese, nga të cilat 20 janë bllokuar për shkelje të rregullave të sigurisë dhe mosrespektim të perimetrit të përcaktuar për lundrim.
Nga informacionet e policisë mësohet se mjetet e bllokuara përfshijnë: 11 jet ski, 5 skafe, 3 gomone dhe 1 varkë metalike me motor uji të instaluar.
Tetë prej mjeteve janë kapur duke lundruar brenda zonës së ndaluar, pranë pushuesve, duke rrezikuar sigurinë e jetës në plazh. Drejtuesit e tyre janë ndëshkuar me një masë administrative prej 100.000 lekësh secili.
Ndërkohë, përmes ndërhyrjes në kohë të strukturave të sigurisë detare, janë shpëtuar 38 shtetas shqiptarë dhe të huaj, si dhe 17 mjete lundruese që ndodheshin në vështirësi në det apo liqene./Radar.al