Në një intervistë për revistën Newsbomb.al, Linda Rama, bashkëshortja e kryeministrit Edi Rama, tregon shumë nga jeta e saj familjare dhe një perspektivë personale mbi rolin e saj krahas pushtetit.
“Kam krijuar një distancë të sigurt nga Pushteti… I kam rezistuar çdo përpjekjeje për të më konsideruar si paradhomë të zyrës së Edit dhe i kam bërë ballë çdo keqkuptimi,” rrëfen Linda Rama.
Ajo shprehet se në familje nuk ka dy jetë paralele, atë politike dhe atë familjare, dhe se përkushtimi ndaj familjes është prioritet. Pak kohë më parë, Linda u bë gjyshe për herë të dytë, pasi vajza e saj Rea solli në jetë Rui, duke e bërë familjen e tyre më të madhe dhe plot gjallëri. “Zaho, Avi dhe Rui janë tre zogj që na mbështjellin me tinguj të hatashëm, qarje dhe qeshje,” thotë Linda.
Linda tregon edhe eksperiencën e saj profesionale dhe përballjen me polemikat politike. “Fillimisht m’u duk çudi që opozita përpiqej të më hiqte mua nga puna studimore, jo Edin,” shprehet ajo, duke treguar sfidat që ka hasur si bashkëshortja e kryeministrit.
Në intervistë, Linda Rama shpreh gjithashtu mendimet e saj për çështje aktuale: prishjet e ndërtimeve pa leje, shkarkimet e drejtorëve të bashkive dhe debatin viral mes qytetarëve dhe inspektorëve, si dhe reflekton mbi popullaritetin ndërkombëtar të sjelljeve të bashkëshortit të saj, si në rastin kur u ul përballë kryeministres italiane Giorgia Meloni.
Ky është një rrëfim i hapur dhe i rrallë, duke qenë se Linda Rama nuk ka dhënë intervista të tjera për 12 vitet e fundit.