Portugalia ka reaguar në mënyrë bindëse pas hapit fals në ndeshjen e parë, duke regjistruar një fitore spektakolare 5-0 ndaj Uzbekistanit në Kupën e Botës 2026. Protagonisti kryesor i mbrëmjes ishte edhe një herë Cristiano Ronaldo, i cili realizoi dy gola dhe udhëhoqi ekipin drejt një suksesi të rëndësishëm.
Pas barazimit 1-1 ndaj Republikës Demokratike të Kongos në debutim, luzitanët nuk lanë vend për surpriza në sfidën e zhvilluar në Hjuston, duke dominuar kundërshtarin nga minuta e parë deri në të fundit.
Cristiano Ronaldo zhbllokoi rezultatin që në minutën e 6-të, duke i dhënë qetësi skuadrës së drejtuar nga trajneri portugez. Vetëm 11 minuta më vonë, Nuno Mendes dyfishoi shifrat me një goditje të saktë, ndërsa Ronaldo riktheu sërish emrin në listën e golashënuesve në minutën e 39-të për të çuar rezultatin në 3-0 para pushimit.
Në pjesën e dytë, dominimi portugez vazhdoi. Portieri uzbek Abdouvakhid Nematov shkaktoi autogolin që solli golin e katërt në minutën e 60-të, ndërsa Rafael Leão vulosi festivalin e golave në minutën e 87-të, duke fiksuar rezultatin përfundimtar 5-0.
Me këtë fitore, Portugalia hedh një hap të madh drejt kualifikimit në fazën e eliminimit direkt dhe konfirmon statusin e saj si një nga pretendentet e turneut. Nga ana tjetër, Uzbekistani i drejtuar nga Fabio Cannavaro ndodhet në një situatë shumë të vështirë dhe rrezikon seriozisht eliminimin e parakohshëm nga kompeticioni.
Për Cristiano Ronaldon, kjo ishte një tjetër mbrëmje historike, teksa legjenda portugeze vazhdon të thyejë rekorde dhe të dëshmojë se mbetet një nga figurat më vendimtare të futbollit botëror edhe në moshën 41-vjeçare.