Pas nëntë vjetësh lidhje, Cristiano Ronaldo dhe e fejuara e tij, Georgina Rodriguez, po planifikojnë dasmën e tyre të madhe. Ceremonia do të zhvillohet këtë verë në ishullin e lindjes së Ronaldos, Madeira, pas përfundimit të Kupës së Botës, raporton The Sun.
Çifti do të thonë “Po”-në e tyre në katedralen historike të Funchal, e ndërtuar në vitin 1514, një nga kishat më të vjetra të qytetit dhe qendra fetare e rajonit, e njohur edhe për çatinë mbresëlënëse. Festimet do të vazhdojnë në një nga hotelet luksoze të ishullit.
Zgjedhja e Funchal ka një kuptim të veçantë për Ronaldon. Katedralja ndodhet pak kilometra larg spitalit ku ai ka lindur dhe afër stadiumit të klubit të tij të fëmijërisë, Nacional da Madeira. Legjenda e Real Madridit kaloi dy vite atje para se, në moshën 12-vjeçare në vitin 1997, të bashkohej me Sporting Lisbon.