BRITANI E MADHE- Artistja me famë botërore me origjinë nga Kosova, Rita Ora mbrëmjen e së dielës gjatë MTV European Music Awards (EMA) 2024, ka përkujtuar mikun e saj të ndjerë, Liam Payne.
Rita Ora mori disa minuta gjatë shfaqjes për të reflektuar mbi jetën e Payne, duke thënë se ai është një prej njerëzve më të sjellshëm dhe më bujarë që kishte njohur ndonjëherë.
Fjalimi i saj i ndjerë ka prekur thellë audiencën. Këngëtarja shqiptare tregoi se ekipi pas ‘EMA’ kishte shqyrtuar mënyra të ndryshme për të nderuar Payne, por në fund vendosi që një mesazh i drejtpërdrejtë dhe i sinqertë do të ishte më kuptimploti. “Ndonjëherë mjafton vetëm të flasësh,” tha ajo.
“Ai solli kaq shumë gëzim në çdo dhomë ku hynte dhe la një shenjë të tillë në këtë botë.”- tha ajo gjatë fjalimit të saj.
Ora ka bashkëpunuar me Liam në këngën “For You” të 2018-ës.
“Dëshiroj vetëm të marr një moment për të kujtuar dikë që ishte shumë, shumë i dashur për ne. Ne e humbëm atë kohët e fundit dhe ai ishte një pjesë e madhe e botës së MTV-së, dhe botës time, dhe mendoj se shumë prej jush në shtëpi dhe të gjithë këtu sonte.”– ka thënë ajo mes lotësh/SKYNEWS/Radar.al