Rikthimi i opozitës në Kuvend, për Berishën, nuk vjen në kundërshtim me vendimin që opozita mori për bojkotimin e aktivitetit parlamentar.
Përgjatë konferencës së sotme, Berisha theksoi se përjashtimi masiv i deputetëve demokratë nga mazhoranca socialiste i detyroi që të mos ishin të pranishëm në Kuvend.
Sipas ish-kryeministrit, keqkuptimi ka qenë se nuk ka asnjë vendim të PD-së për bojkotin e seancave parlamentare.
“Në rast se i rikthehemi, ju e dini që deputetët tanë që nuk kanë qenë të përjashtuar, kanë shkuar në çdo seancë, por janë bllokuar te dera në mënyrë të paligjshme. Nuk ka pasur asnjë vendim, edhe njëherë, që të braktiset, që të bojkotohet parlamenti, gjë që mund të merrej, por nuk është marrë,” tha Berisha.
Për opozitën, buxheti i vitit të ardhshëm mbetet një nga çështjet më të rëndësishme në parlament, pohoi Berisha, teksa shtoi se mosbindja civile për demokratët do të vijojë.
“Ne jemi të detyruar të dërgojmë amendamente për këto dhe nuk besoj se PD do të kishte mirëkuptim nga qytetarët nëse ajo debatin për buxhetin nuk e bënte edhe në parlament. Thënë këto, nuk lëviz asgjë nga mosbindja civile. Ju garantoj me përgjegjësi të plotë këtë. Ajo do të vazhdojë në rrugë, sheshe dhe kudo,” deklaroi Berisha.