Deputeti Ferdinand Xhaferaj ka dhënë një analizë të detajuar mbi arsyet që, sipas tij, e bëjnë të pamundur fitoren e Partisë Demokratike në zgjedhjet e 11 majit. I ftuar në emisionin Dekalog nga gazetari Roland Qafoku në DritareTv, Xhaferaj ka kritikuar ashpër drejtimin e PD-së dhe ka theksuar se këto zgjedhje janë të paracaktuara dhe rezultati i tyre dihet që në fillim.
Sipas Xhaferajt, “zgjedhjet në demokraci i karakterizon pasiguria, që fituesi nuk dihet. Ndryshe nga këto zgjedhje, ku rezultati dihet, dhe prandaj janë zgjedhjet më të shëmtuara që kam parë ndonjëherë.” Ai ka shtuar se mënyra se si u organizua opozita dhe vendimet e marra gjatë tre viteve të fundit, kanë çuar në krijimin e një opozite të pafuqishme, që nuk mund të sjellë një rotacion politik. “Palët kanë hyrë në garë për interesa të kundërta, pra mënyra se si e djathta u konceptua dhe vendimmarrja që pati për këto 3 vite dhe për shumë gjëra të tjera është e formuar në atë mënyrë që nuk e siguron dot rotacionin.”
Deputeti ka kritikuar gjithashtu Sali Berishën, duke e akuzuar atë si përgjegjës për dobësinë e opozitës. “Unë kritikën e bazoj në argument ndaj them se zgjedhjet në demokraci i karakterizon pasiguria që fituesi nuk dihet. Ndryshe nga këto zgjedhje, ku rezultati dihet,” u shpreh Xhaferaj. Ai ka deklaruar se që para tre vitesh ka filluar të kritikojë mënyrën se si po udhëhoqej PD, dhe ka shtuar se ai ka qenë dhe mbetet mbështetës i SPAK-ut, por se proceset ligjore ndaj Berishës janë të mbështetura në “argumente të lëkundshëm.” Ai ka shprehur dëshirën që Berishës t’i hiqet statusi “non-grata”, duke theksuar se ky status ishte tërësisht i papërshtatshëm për të, duke pasur parasysh drejtimin që ai ka pasur mbi shtetin.
Në analizën e tij, Xhaferaj ka përmendur dhe problemin e largimit dhe rikthimit të Lulzim Bashës në PD, duke thënë: “E mori Lulzim Bashën dhe e solli në PD, nuk e largoi as në 2017 e as në 2021-in kur Basha nuk ishte i zoti të zgjidhte hallin e demokratëve.” Ai ka shtuar: “Ne nuk mund të zhvillonim luftë me njëri-tjetrin kur përballë kishim Edi Ramën.”
Ai ka përmendur gjithashtu kritikat për mënyrën se si Berisha ka ndarë drejtimin e partisë, duke u bazuar jo në kritere merite, por në kush ka qëndruar më afër tij dhe ka shërbyer për të, veçanërisht në kohën kur ai ka pasur probleme me drejtësinë. “Caktoi drejtues politik jo mbi kritere se kush jep më shumë në qarkun caktuar, por mbi kriterin kush më qëndroi mua afër dhe kush më shërbeu kur unë kisha probleme me drejtësinë.”
Një tjetër kritikë ka qenë ndaj mosrespektimit të primareve dhe krijimit të listave të kandidatëve sipas interesave personale të Berishës. “Gjithashtu ndërtoi lista me kriterin se kush i kishte shërbyer atij.” Këto janë disa nga arsyet që Xhaferaj e sheh të pamundur rotacionin politik dhe e bën opozitën të pafuqishme për të fituar zgjedhjet.