Real Madridi siguroi një fitore dramatike ndaj Rayo Vallecanos në “Santiago Bernabéu”, duke triumfuar falë një penalltie të realizuar nga Kylian Mbappé në minutën e 100-të të ndeshjes.
Sfida u zhvillua mes tensionit dhe nervozizmit në tribuna, teksa vendasit shfaqën sërish paqartësi në lojë. Real Madridi kaloi në avantazh në pjesën e parë me një gol spektakolar të Vinicius Jr., por Rayo reagoi pas pushimit, duke barazuar shifrat me De Frutos.
Skuadra mike pati disa raste të pastra për të kaluar në avantazh, por u ndal nga pritjet vendimtare të Thibaut Courtois. Kur ndeshja dukej se do të përfundonte në barazim, Real fitoi një penallti në sekondat e fundit të takimit.
Nga pika e bardhë, Mbappé u tregua i saktë, duke i dhënë tri pikë të arta “Los Blancos”-it, që mbeten një pikë larg Barcelonës në garën për kreun e tabelës.