Qarku i Dibrës vazhdon të përballet me situatë problematike për shkak të reshjeve të dendura dhe stuhive. Gjatë natës së kaluar, reshjet kanë shkaktuar dëme të konsiderueshme në rrugën nacionale Skuraj–Burrel, ndërsa problemi më i madh është shfaqur në fshatin Shkopet, ku rruga ka qenë e bllokuar për më shumë se 3 orë pas shembjes së gurëve dhe inerteve nga shpati i malit. Punonjësit e firmës përgjegjëse kanë punuar gjatë gjithë natës për pastrimin dhe rikthimin e qarkullimit.
Probleme janë raportuar edhe në rrugët rurale të qarkut, ku janë regjistruar rrëshkitje dhe bllokime, ndërsa disa zona, si Baz dhe Ulëz, kanë përjetuar ndërprerje të furnizimit me energji elektrike. Për të vlerësuar situatën, pritet të mblidhet Shtabi i Emergjencave pranë prefekturës dhe të dalë në terren për monitorim.
Reshjet e shiut, që po vijojnë në formë cikloni, kanë bërë që lumenjtë dhe përrenjtë të dalin nga shtrati, duke përmbytur banesa dhe toka bujqësore.