Evropa Perëndimore sapo ka përjetuar qershorin më të nxehtë në historinë e saj, sipas të dhënave nga Shërbimi i Ndryshimeve Klimatike “Koperniku” i Bashkimit Evropian. Temperatura mesatare mujore arriti në 20.49°C, duke thyer rekordin e mëparshëm prej 20.43°C të vendosur në vitin 2003.
Sipas ekspertes Samantha Burgess nga Qendra Evropiane për Parashikime Afatmesme (ECMWF), e cila administron shërbimin e BE-së, “valët e nxehtësisë që goditën Evropën këtë qershor ishin jashtëzakonisht intensive dhe shtriheshin në pjesën më të madhe të kontinentit.”
Sipas saj, këto kushte ekstreme u përkeqësuan nga temperaturat rekord të sipërfaqes së detit në Mesdheun perëndimor, ku u regjistrua temperatura mesatare ditore më e lartë ndonjëherë – 27°C.
Gjatë qershorit, dy valë të fuqishme të nxehtësisë goditën rajonet perëndimore dhe jugore të Evropës: një në mes të muajit dhe një tjetër në fund. Situata u përshkallëzua duke shkaktuar stres të rëndë termik në popullatë dhe shtim të rreziqeve për shëndetin publik.
Në nivel global, qershori 2025 u rendit si muaji i tretë më i ngrohtë në histori, pas qershorëve të viteve 2023 dhe 2024, me një temperaturë mesatare në sipërfaqen e tokës prej 16.46°C.
Burgess paralajmëroi se në një botë në ngrohje të vazhdueshme, valët e nxehtësisë do të bëhen gjithnjë e më të shpeshta, më intensive dhe me ndikim më të madh në jetën e përditshme të qytetarëve evropianë.