Bashkia e Tiranës ka hapur regjistrimet për vitin 2024-2025 në çerdhe dhe kopshte publike përmes platformës online e-femijet.tirana.al, duke lehtësuar ndjeshëm procesin për prindërit.
Platforma është funksionale nga 2 deri më 22 qershor dhe ofron mundësinë për:
Regjistrim të ri në çerdhe
Regjistrim në kopsht
Transferim nga çerdhe në kopsht
Transferim nga një institucion në një tjetër
Drejtoresha e Kopshteve dhe Çerdheve në Tiranë, Zhaneta Beqiri, deklaroi për Euronews Albania se deri tani janë realizuar rreth 5900 aplikime, duke treguar një interes të lartë nga prindërit.
Pas mbylljes së aplikimeve, nga 22 qershori deri në mesin e gushtit, do të zhvillohet faza e shqyrtimit dhe vlerësimit të kërkesave. Prindërit do të njoftohen përmes email-it dhe deri më 1 shtator, të gjithë fëmijët e përzgjedhur do të kenë të drejtën të ndjekin çerdhen ose kopshtin përkatës.
Si funksionon aplikimi?
Hyni në platformën e-femijet.tirana.al
Krijoni një llogari me të dhënat personale.
Zgjidhni kategorinë e duhur të aplikimit.
Ngarkoni dokumentet e nevojshme:
Certifikatë personale dhe familjare të fëmijës
Vërtetim pune dhe paga për prindërit
Vërtetim kontributesh nga e-Albania
Vërtetim vaksinimesh
Për raste transferimi: arsyeja dhe dokumentacioni përkatës
Për kategori të veçanta: dokumente që justifikojnë statusin
Aplikantët duhet të paguajnë edhe një garanci prej 5,000 lekësh në zyrat e Postës Shqiptare – e nevojshme për përfundimin e regjistrimit.
Për prindërit që hasin vështirësi teknike, në çdo institucion është caktuar një person ndihmës që asiston në procesin online.