Pas dorëzimit të materialeve hetimore nga SPAK, avokatët ndërkombëtarë që mbrojnë Erion Veliajn kanë dalë me një reagim të fortë, duke akuzuar prokurorinë për shkelje të të drejtave themelore dhe trajtim jo të drejtë të klientit të tyre.
Sipas mbrojtjes, hetimi i zgjatur i SPAK-ut është zhvilluar në mënyrë të njëanshme dhe në shkelje të Konventës Evropiane për të Drejtat e Njeriut (KEDNJ). Veliaj i mohon me forcë të gjitha akuzat dhe avokatët e tij e konsiderojnë vazhdimin e ndalimit si “të paarsyeshëm, të panevojshëm dhe joproporcional”.
Një shqetësim i madh mbetet pamundësia e Veliajt për t’u komunikuar me avokatët e tij ndërkombëtarë për rreth tre muaj, çka sipas mbrojtjes cenon seriozisht të drejtat e tij ligjore. Gjithashtu, avokatët kritikojnë rrjedhjen e të dhënave nga hetimi në media, përfshirë përmbajtjen e raportit të Prokurorisë, të publikuara para informimit zyrtar të mbrojtjes.
Në reagimin e tyre, avokatët theksojnë se Veliaj, si funksionar i zgjedhur në mënyrë demokratike, i është pamundësuar ushtrimi i mandatit dhe nuk ka prova që justifikojnë vazhdimin e ndalimit të tij. Ata paralajmërojnë se do të vazhdojnë bashkëpunimin me mbrojtjen lokale dhe do të përdorin çdo mjet ligjor në dispozicion për të mbrojtur të drejtat e klientit.
Reagim i avokatëve ndërkombëtarë të z. Veliaj:
Sot, 163 ditë pas ndalimit të z. Erion Veliaj, rezultatet e hetimit të zgjatur nga SPAK i janë dorëzuar nga ana e prokurorisë së posaçme. Avokatët e z. Veliaj mund të nisin tashmë shqyrtimin e provave të çështjes, të kundërshtojnë qëndrimin e SPAK-ut ndaj tij dhe të paraqesin prova në mbështetje të mbrojtjes.
Veliaj i mohon në mënyrë të prerë të gjitha akuzat për shkelje të ligjit. Ne mbetemi në bindjen se vijimi i ndalimit të z. Veliaj është i paarsyeshëm, i panevojshëm dhe joproporcional. Kemi shqetësime serioze se kërkesat e Konventës Evropiane për të Drejtat e Njeriut (KEDNJ) nuk janë respektuar në rastin e tij. Fatkeqësisht, prej gati 3 muajsh, z. Veliaj është penguar të ketë akses te avokatët e tij ligjorë ndërkombëtarë, gjë që cenon seriozisht aftësinë e tij për të ushtruar të drejtat që i garanton KEDNJ-ja.
Si një funksionar i zgjedhur në mënyrë demokratike, të cilit i është pamundësuar ushtrimi i mandatit, është thelbësore që SPAK të ketë vlerësuar domosdoshmërinë e vazhdimit të ndalimit të tij. Deri më sot, nuk ka asnjë provë që kjo është bërë.
Jemi thellësisht të shqetësuar për mënyrën se si është zhvilluar hetimi. Së fundmi, detaje në lidhje me përfundimin e hetimit dhe raportin e Prokurorisë janë rrjedhur në mediat shqiptare. Kjo rrjedhje informacioni është në përputhje me trajtimin që i është bërë z. Veliaj që prej ditës së arrestimit, ku të dhëna paragjykuese mbi hetimin e SPAK-ut janë publikuar vazhdimisht në hapësirën publike. Nga informacionet e marra prej avokatëve të tij vendas, kuptojmë se këto rrjedhje përbëjnë shkelje të sekretit hetimor sipas legjislacionit shqiptar.
Ne do të vazhdojmë të punojmë ngushtësisht me ekipin ligjor vendas të z. Veliaj dhe të ndjekim çdo mjet ligjor të mundshëm.