Kryeministri Edi Rama reagoi sërish ndaj raportit të “Reporterëve Pa Kufij” për lirinë e medias në Shqipëri, duke deklaruar se opozita dominon hapësirën mediatike në vend.
Në një koment të gjatë, Rama tha se një analizë e realizuar me inteligjencë artificiale nga një startup shqiptar tregon se rreth 60% e kohës televizive në Shqipëri është në kahun antiqeveri, ndërsa vetëm një pjesë shumë e vogël rezulton pro qeverisë.
Sipas tij, e njëjta panoramë shfaqet edhe në mediat online dhe portalet, të cilat, sipas Ramës, anojnë qartësisht kundër qeverisë.
“Kjo tregon se Shqipëria nuk është një vend me media të kapura apo me gojë të mbyllura. Përkundrazi, këtu dominon kritika ndaj qeverisë”, u shpreh Rama.
Kryeministri shtoi se përpjekjet për të kontrolluar mediat nuk sjellin fitimin e “zemrave dhe mendjeve të njerëzve”, ndërsa akuzoi opozitën për mungesë vizioni, programi dhe lidershipi.