Dy raporte të publikuara më 2 korrik 2026 nga organet amerikane të auditimit kanë nxjerrë në pah një sërë mangësish serioze në funksionimin e Shërbimit Sekret të SHBA-së, duke arritur në përfundimin se atentati ndaj Donald Trump gjatë fushatës presidenciale të vitit 2024 mund të ishte shmangur.
Dokumentet rikthejnë në vëmendje sulmin e 13 korrikut 2024 në Butler të Pensilvanisë, ku Trump u plagos lehtë në vesh gjatë një tubimi elektoral. Në atë ngjarje humbi jetën një person nga publiku, ndërsa autori i sulmit, Thomas Matthew Crooks, u vra nga snajperët e forcave të rendit.
Sipas auditimit, sulmuesi ishte identifikuar mbi çatinë e një ndërtese me armë në dorë rreth dy minuta përpara se të hapte zjarr. Megjithatë, informacioni nuk iu përcoll në kohë ekipit të sigurisë që mbronte kandidatin republikan.
Raporti evidenton gjithashtu se Shërbimi Sekret nuk arriti të zbulonte dronin që Crooks kishte përdorur për të vrojtuar zonën e tubimit. Kjo, sipas hetuesve, lidhej me mungesën e trajnimit të operatorëve dhe me probleme teknike të pajisjeve të përdorura.
Një tjetër problem i rëndë ishte mungesa e një qendre të përbashkët komunikimi mes Shërbimit Sekret dhe autoriteteve lokale. Për pasojë, agjentët pranë Trump nuk u njoftuan se i dyshuari ndodhej në çati i armatosur me një pushkë.
Auditimi thekson se edhe perimetri i sigurisë kishte mangësi të konsiderueshme. Zona jashtë aktivitetit nuk ishte kontrolluar plotësisht, pavarësisht paralajmërimeve të mëhershme të Policisë Shtetërore të Pensilvanisë. Po ashtu, nuk u përdorën të gjitha mjetet në dispozicion për të bllokuar vijën e shikimit mes sulmuesit dhe objektivit.
Sipas raportit, mungesa e procedurave të qarta, shkëmbimi i pamjaftueshëm i informacionit dhe koordinimi i dobët me autoritetet shtetërore e lokale krijuan kushtet që sulmi të mos parandalohej.
Një raport i dytë zbulon se në periudhën 2023–2024 Shërbimi Sekret u përball edhe me mungesë të theksuar personeli. Mesatarisht, rreth 21.4% e pozicioneve të punës rezultonin vakante, duke bërë që agjentët të kryenin rreth 1.2 milion orë shtesë pune. Sipas auditimit, kjo situatë ndikoi në lodhjen e stafit dhe shtimin e largimeve nga detyra.
Në reagimin e saj, agjencia amerikane theksoi se pas atentatit ka ndërmarrë reforma të shumta për të përmirësuar sigurinë, duke investuar në teknologji, duke forcuar procedurat operative dhe duke përshpejtuar procesin e rekrutimit të personelit. Sipas Shërbimit Sekret, koha mesatare për punësimin e një agjenti special është reduktuar në 326 ditë, ndërsa për një oficer policie në 256 ditë, falë thjeshtimit të procedurave administrative.