Përfaqësuesja e Lartë e Bashkimit Evropian për Punët e Jashtme dhe Politikën e Sigurisë, Kaja Kallas, ka vlerësuar progresin e vendeve të Ballkanit Perëndimor në procesin e integrimit evropian, duke veçuar Shqipërinë dhe Malin e Zi si dy vende për të cilat Bashkimi Evropian ka kapacitet të plotë për t’i pranuar.
Në një intervistë për një agjenci boshnjake të lajmeve, Kallas u shpreh se zgjerimi i BE-së mbetet një prioritet strategjik dhe se ritmi i këtij procesi pritet të përshpejtohet në vitet në vijim.
Sipas saj, integrimi i vendeve të Ballkanit Perëndimor është në interes të vetë Bashkimit Evropian, pasi kontribuon në stabilitetin, sigurinë dhe të ardhmen e përbashkët të rajonit.
“Zgjerimi nuk është një lojë me fitues dhe humbës. Ose të gjithë janë pjesë e tij, ose askush. Nëse marrim si shembull Malin e Zi ose Shqipërinë, ato janë vende që Bashkimi Evropian ka kapacitetin t’i mirëpresë. Është gjithashtu e qartë se është në interesin tonë që vendet e Ballkanit Perëndimor t’i bashkohen Bashkimit Evropian. Ky është gjithmonë një proces i dyanshëm”, deklaroi Kallas.
Komentet e shefes së diplomacisë evropiane vijnë në një periudhë kur procesi i zgjerimit të BE-së ka marrë një vëmendje të shtuar, ndërsa vendet kandidate vijojnë reformat e kërkuara për avancimin në rrugën drejt anëtarësimit.