Kryeministri Edi Rama ka reaguar sot ndaj vendimit të gjyqtarit Hazbi Balliu, i cili ka favorizuar ndërtuesin e paligjshëm në një pallat të konfiskuar në Tiranë, ku ka funksionuar Agjencia Shtetërore e Kadastrës (ASHK). Rama e ka cilësuar vendimin si “skandaloz”, duke e kritikuar ashpër gjyqtarin për marrjen në mbrojtje të palës që ndërtoi pallatin pa leje.
Kryeministri publikoi edhe fotografi nga godina e vjetër e ASHK-së, duke theksuar se për gjyqtarin Balliu kjo duket të jetë një “vend normal pune për sa kohë nuk ka viktima”, megjithë dëmtimet serioze nga tërmeti dhe rënien e tavaneve dhe mureve.
“Se si mund të shkruajë një gjykatës se ASHK-ja nuk ka prova që nuk mund të vazhdojë të rrijë në një godinë ku bien tavanet dhe muret, kjo kërkon një durim heroik në pritje që organet e kontrollit të zgjohen nga gjumi i tyre, i cili po bëhet gjithnjë e më i rrezikshëm për fatet e Reformës në Drejtësi”, shkroi Rama.
Sipas vendimit të gjykatës, ASHK ka funksionuar për katër vite rresht në të njëjtën godinë pas vitit 2021 dhe nuk ka prova që kjo situatë pengon funksionimin e institucionit. Gjykata thekson se, pavarësisht kushteve të vështira, mungesa e komoditetit nuk përbën cenim të rëndë të interesit publik që të pezullojë veprimtarinë e ASHK-së.
Rama e cilëson këtë arsyetim si një shenjë të qartë të favorizimit të ndërtuesve të paligjshëm dhe thekson rrezikun që vendimet e tilla paraqesin për sigurinë e punonjësve dhe funksionimin e institucioneve publike.