Kryeministri Edi Rama nga Asambleja e PS të dielën deklaroi se se Partia Demokratike në zgjedhjet e 2025 nuk do të marrë më shumë mandate nga sa ka fituar në vitin 1997.
“Në zgjedhjet e ardhshme, PD-ja zor se do të marrë më shumë mandate se në vitin 1997. Mbajeni shënim!”. Ai sqaroi se PS-ja di të lexojë mendjen e popullit, jo vetëm se ka patronazhistët, por edhe sepse ka një strukturë shkencore të kolauduar, që bën anketime të përmuajshme të opinioneve të njerëzve.
Radar.al raporton se më 1997, PD mori vetëm 25 nga 140 mandate gjithsej, përballë 101 mandateve të Partisë Socialiste.
Sot reagoi dhe deputeti i PD Oerd Bylykbashi i cili tha se që të shmanget skenari i ’97, duhet të lirohet Sali Berisha, dhe t’i hapet rruga qeverisë teknike.
“Partia Demokratike e merr shumë seriozisht këtë premtim të Edi Ramës për të rikthyer standardin e 1997 në zgjedhje. Partia Demokratike do t’i përgjigjet fort, në mënyrë të plotë dhe proporcionale dhe me çdo mjet legjitim, skenarit të Edi Ramës. Edi Rama, çdo vegël e tij, çdo patronazhist, çdo institucion i shtetit, përfshirë gjoja të pavarurit, do të mbajnë përgjegjësi të plotë nëse angazhohen apo i hapin rrugë këtij skenari. Edhe njëherë, që të shmangen skenarët e ’97-ës, Partia Demokratike kërkon lirimin e Sali Berishës, qeveri teknike dhe zgjedhje të lira e të ndershme!”- u shpreh Bylykbashi.