Kryeministri Edi Rama, gjatë një takimi me të rinjtë në Shkodër këtë të enjte, ka bërë një deklaratë me tone ironike dhe politike, duke iu drejtuar në mënyrë të veçantë vajzave të reja në sallë.
Rama tha se vajzat që kanë në krah ndonjë simpatizant të Partisë Demokratike duhet ta shfrytëzojnë këtë moment për ta vënë në provë, nëse ai është me rrugën e integrimit europian apo me opozitën, të cilën e cilësoi me një metaforë si “bufi i kënetës”.
“Me një porosi për gocat këtu, që cilado prej tyre që ka ndonjë simpatizant demokrat – ndodh – u ka ardh në dorë rasti ideal për ta vënë në provë simpatizantin, se sa mend ka. Jo për ta bërë socialist, absolutisht jo. Demokratët le të rrinë demokratë, por me Shqipërinë dhe BE-në në Europë, apo me bufin e kënetës në gropë?!”, u shpreh Rama.
Ai shtoi me ironi se nëse dikush deklaron që është me “bufin e kënetës”, vajzat duhet ta “përcjellin”.
“Nëse ai thotë ‘jam me bufin e kënetës’, është koha për ta përcjellë dhe për të parë majtas,” tha Rama, duke shoqëruar fjalët me një gjest largimi me dorë.
Deklarata vjen në prag të zgjedhjeve të 11 majit, ku Rama e konsideroi votën për Partinë Socialiste si një votë për integrimin europian.