Në kuadër të forcimit të bashkëpunimit rajonal në fushën e komunikimeve elektronike, Autoriteti i Komunikimeve Elektronike dhe Postare (AKEP) mirëpriti sot në Tiranë delegacionin e Agjencisë për Komunikime Elektronike të Maqedonisë së Veriut (AEK), të kryesuar nga Drejtori i Agjencisë, z. Jeton Akiku, si dhe nga Kryetari i Komisionit, Prof. Dr. Orce Simov.
Delegacioni u prit nga Kryetari i AKEP, z. Gentian Sala, së bashku me anëtarët e Këshillit Drejtues dhe drejtues të strukturave kryesore të institucionit.
Gjatë takimit dypalësh, palët shkëmbyen pikëpamje mbi zhvillimet më të fundit në sektorin e komunikimeve elektronike dhe theksuan rëndësinë e bashkëpunimit rajonal në një treg gjithnjë e më të integruar.
Diskutimet u përqendruan në përafrimin me standardet e Bashkimit Evropian dhe zhvillimin e infrastrukturave moderne, përfshirë rrjetet me fibër optike dhe teknologjinë 5G.
Gjithashtu, u diskutua edhe për sfidat e përbashkëta në rregullimin e tregut dhe rëndësinë e koordinimit të politikave rregullatore.
Takimi u vlerësua si një mundësi e mirë për thellimin e bashkëpunimit ndërinstitucional dhe për shkëmbimin e praktikave më të mira në funksion të zhvillimit të qëndrueshëm të sektorit të komunikimeve elektronike në rajon.