Kryeministri Edi Rama, njëherësh kryetar i Partisë Socialiste, do të zhvillojë nesër një mbledhje të zgjeruar me grupin parlamentar socialist dhe kabinetin qeveritar.
Përmes një postimi në rrjetet sociale, Rama publikoi momente nga përgatitja e fjalës që do të mbajë në këtë takim, ndërsa jashtë godinës së Kryeministrisë vijonin thirrjet e protestuesve për dorëheqjen e tij.
Duke iu referuar protestës, Rama i cilësoi thirrjet e qytetarëve si “këngën e tij të preferuar” dhe tha se do të jetë i drejtpërdrejtë në fjalën e tij gjatë mbledhjes.
“Mëngjes nga Tirona e kontradiktave. Zhurmë, zhurmë, shumë zhurmë. Përgatitje me audio live nga bulevardi. Kush ka interes, nesër paradite do të jem live”, u shpreh kryeministri.
Rama bëri të ditur se në mbledhjen me deputetët dhe ministrat do të paraqesë reflektimet e tij mbi situatën aktuale dhe atë që ai e cilësoi si “pasqyrën e bulevardit”.
“Jam duke shkruar fjalën për nesër në mbledhjen e grupit parlamentar dhe të qeverisë. Desha të ndaj me ju këtë moment, sepse ky kor ‘Rama jep dorëheqjen’ më ekzalton. Shihemi nesër paradite. Mbledhja fillon në orën 09:30”, deklaroi Rama.
Kryeministri shtoi se gjatë fjalimit do të ndajë këndvështrimin e tij mbi zhvillimet e fundit politike dhe shoqërore.