Kryeministri Edi Rama i ka shtrirë dorën të gjitha grave shqiptare sot në takimin e organizuar nga Partia Socialiste në Teatrin Kombëtar të Operas dhe Baletit, takim i cili i paraprin çeljes së fushatës për zgjedhjet e 11 majit.
“Shqipëria është grua, Europa është grua”, është motoja e këtij takimi me gratë socialiste në të 12 qarqet e vendit.
Kryeministri Rama bëri të ditur sot se në rang kombëtar 56% e zgjedhësve që mbështesin PS-në janë gra dhe vajza ndërsa në qarqe të caktuara kjo mbështetje shkon deri në 65%.
Rama i konsideroi gratë dhe vajzat socialiste “komandot” e armatës fitimtare të PS-së.
Ai theksoi se suksesi i përpjekjes për Shqipërinë 2030 në BE varet në radhë të parë nga nënat, motrat dhe bijat e Shqipërisë.
“Nëse te gratë dhe vajzat avantazhi ynë ndaj kënetës është goxha i madh te burrat është ndjeshëm më i ngushtë. Këtë mbështetje kuptimplotë, prekëse dhe inkurajuese të pjesës më të ndjeshme, më të arsyeshme, më sakrifikuese të popullit shqiptar që janë gratë dhe vajzat unë nuk do ta ndërroja kurrë me mbështetjen e pjesës tjetër, mbështetjen e burrave dhe djemve, që pa diskutim e çmoj shumë, siç çmoj çdo shqiptar dhe shqiptare që na mbështet”, tha Rama.
“Ndaj edhe sot në ditën e rënies së gongut të fushatës zgjedhore nuk mund ta nisnim këtë etapë të fundit të finishit të 11 majit përveçse kështu dhe këtu, me gratë dhe vajzat që duke njohur nga brenda organizimin organizatave socialiste janë ‘komandot’ e armatës sonë fitimtare në të gjitha qarqet e vendit që koordinojnë veprimtaritë e të gjitha njësive të skuadrave brenda dhe jashtë Shqipërisë”, shtoi Rama.