Kryeministri në detyrë i Kosovës, Albin Kurti, ka udhëtuar në Londër për të marrë pjesë në Samitin e Procesit të Berlinit më 22 tetor. Gjatë qëndrimit në kryeqytetin britanik, Kurti do të zhvillojë takime bilaterale me liderë të rajonit dhe të Bashkimit Evropian, si dhe do të marrë pjesë në ngjarje të ndryshme në kuadër të samitit.
Në këtë samit do të jetë i pranishëm edhe kryeministri i Shqipërisë, Edi Rama. Takimi i tyre vjen pas përplasjeve të fundit përmes distancës, lidhur me tubimin në mbështetje të UÇK-së në Tiranë dhe qëndrimet për Gjykatën Speciale. Të dy liderët pritet të ndajnë të njëjtën tryezë gjatë samitit.
Temat kryesore të diskutimit do të jenë siguria, zhvillimi ekonomik dhe migrimi, ndërsa liderët e gjashtë vendeve të Ballkanit Perëndimor pritet të nënshkruajnë deklarata të përbashkëta për Tregun e Përbashkët Rajonal dhe bashkëpunimin në fushën e energjisë.
Procesi i Berlinit, i nisur nga Gjermania në vitin 2014, synon të forcojë bashkëpunimin rajonal dhe të përshpejtojë integrimin evropian të vendeve të Ballkanit Perëndimor.