Kryeministri në detyrë i Kosovës, Albin Kurti, ka paralajmëruar ndryshime në kabinetin e qeverisë “Kurti 3”, duke konfirmuar se emrat e propozuar për postet ministeriale nuk do të jenë identikë me ata që i prezantoi më parë para zgjedhjeve të parakohshme.
“Do të ketë shumë prej emrave që tashmë i kam prezantuar edhe unë dhe Glauk Konjufca vjeshtën e vitit të kaluar, mirëpo nuk do të jenë identikë. Do të ketë edhe emra të tjerë”, deklaroi Kurti në Podujevë.
Në listën e propozuar për kabinetin e ri janë përfshirë emra të rinj, ndërkohë që disa ministra aktualë nuk do të vazhdojnë në detyrë, përfshirë zëvendëskryeministrin Besnik Bislimi, ministren e Tregtisë Rozeta Hajdari, ministrin e Pushtetit Lokal Elbert Krasniqi dhe ministren e Arsimit Arbërie Nagavci.
Për postin e Ministrit të Infrastrukturës, Kurti ka propozuar kryetarin e Kuvendit, Dimal Basha. Ministrinë e re për Familje e Mirëqenie Sociale do ta udhëheqë Andin Hoti, ndërsa për Kulturë dhe Turizëm është propozuar aktori Fatmir Spahiu.
Për Ministrinë e Mjedisit dhe Planifikimit Hapësinor, Kurti ka zgjedhur Fitore Pacollin, e cila nuk ka mbajtur më parë post ministerial. Ministren e deritanishme të Punëve të Jashtme, Donika Gërvalla, Kurti e ka propozuar për Ministrinë e Drejtësisë, që më parë drejtohej nga Albulena Haxhiu.
Në dy raste, Kurti dhe Glauk Konjufca kanë propozuar rritjen e numrit të ministrive nga 15 në 19, duke synuar të përfshijnë më shumë fusha në ekzekutiv.
Kryeministri në detyrë ka theksuar nevojën që Kuvendi të formohet sa më shpejt, të miratohen marrëveshjet ndërkombëtare që sjellin përfitime milionëshe për Kosovën dhe të finalizohet sa më parë buxheti i vitit.
Në zgjedhjet e fundit, më 28 dhjetor, Lëvizja Vetëvendosje e Kurtit mori mbi 50% të votave, një rezultat që i lejon formimin e qeverisë kryesisht me pakicat.