Qeveria britanike po shqyrton një plan të ri për strehimin e azilkërkuesve, duke i larguar ata nga hotelet dhe duke i vendosur kryesisht në kazerma ushtarake ose në objekte të tjera alternative.
Sekretari i Mbrojtjes, John Healey, konfirmoi se ky skenar po diskutohet nga ekzekutivi i kryeministrit Keir Starmer, i cili ka qenë nën presion të vazhdueshëm për kostot dhe pasojat e strehimit të emigrantëve në hotele.
Aktualisht, mbi 32 mijë azilkërkues janë të akomoduar në hotele në Britaninë e Madhe, shifër që përfaqëson një rritje me gati 40% krahasuar me të njëjtën periudhë të vitit të kaluar dhe numrin më të lartë të regjistruar ndonjëherë në këtë stinë.
Qeveria është përballur me kritika të forta dhe protesta të vazhdueshme, pasi shumë qytetarë e shohin si të papranueshme që azilkërkuesit të akomodohen në hotele, shpesh me shërbime të plota.
“Çfarë dreqin janë duke bërë këta, po u japin hotele me katër yje? Po vijnë këtu, po marrin dhe akomodim me mëngjes, po u ofrohen edhe lehtësira të tjera… nuk është faji i njerëzve, sepse ata vijnë në kërkim të një jete më të mirë, këtë e kuptoj. Problemi në këtë rast është qeveria”, tha një protestues.
Starmer ka paralajmëruar se deri në fund të vitit 2029, përdorimi i hoteleve për strehimin e azilkërkuesve do të ndërpritet përfundimisht.