MOSKË- Presidenti i Rusisë, Vladimir Putin e përdori fjalimin e tij vjetor të Ditës së Fitores në Sheshin e Kuq të Moskës për të justifikuar luftën e tij në Ukrainë.
Duke folur para personelit ushtarak dhe i shoqëruar nga disa liderë botërorë, presidenti rus tha se po luftonte një luftë “të drejtë” dhe e quajti Ukrainën një “forcë agresive” që po “armatoset dhe mbështetet nga blloku i NATO-s”.
Teksa iu drejtua turmës, Putin e nisi fjalimin e tij duke përkujtuar sakrificat e ushtarëve të BRSS-së gjatë Luftës së Dytë Botërore.
“Bëma e madhe e brezit të fitimtarëve frymëzon ushtarët që zbatojnë qëllimet e operacionit special ushtarak sot“, tha ai, duke iu referuar luftës në Ukrainë.
“Ata po përballen me një forcë agresive të armatosur dhe të mbështetur nga i gjithë blloku i NATO-s. Dhe pavarësisht kësaj, heronjtë tanë ecin përpara.”/ Radar.al