Gazetari Saimir Kola ka ngritur shqetësime në rrjetet sociale lidhur me ndërhyrjet që po kryhen në ish-burgun famëkeq të Spaçit. Në një postim të shoqëruar me disa foto nga terreni, ai shkruan se aktualisht në këtë zonë po zhvillohen punime restaurimi, ku ndërtesat e dikurshme të burgut po suvatohet dhe lyer me grafiato.
Sipas Kolës, ndërhyrja është e paqartë dhe pa transparencë, dhe ai ngre shqetësimin se ky vend me histori të dhimbshme për Shqipërinë nuk mund të trajtohet si një objekt i zakonshëm ndërtimi.
“Nuk kam informacion se kush po i kryen këto punime, por ai vend nuk ka qenë resort, ka qenë ferri i Shqipërisë,” shkruan ai, duke shtuar me ironi se ndërhyrja të krijon përshtypjen sikur godina po përgatiten për t’u rikthyer në funksion.
Gazetari ka paralajmëruar se do të publikojë pamje të tjera video nga vendngjarja për të hedhur më shumë dritë mbi këtë çështje që ka ngjallur reagime të shumta në rrjet.