Janë zbuluar fotot e viktimës së atentatit të 1 dhjetorit në lokalin Kështjella në Ndroq, Alfred Dedja dhe autorit të dyshuar Julian Gjoshi.
Nga raportimet e fundit është mësuar se disa vite më parë viktima Alfred Dedja ka qenë menaxher te kompleksi Golden në Shijak, i cili është në pronësi të Altin Hajrit.
Në këtë kompleks dyshohet të jetë mbajtur peng dhe më tej të jetë vrarë 49-vjeçari Jan Prenga në 2020. Kamerat e sigurisë kanë kapur momentin teksa Prenga nxirret me forcë nga një makinë dhe futet në ambientet e kompleksit “Golden” që është në pronësi të vëllezërve Hajri, njëri i arrestuar dhe tjetri, Altin Hajri ende në kërkim.
LEXO EDHE
Kurse Julian Gjoshi figuron një emër i njohur për blutë, i arrestuar me armë pa leje dhe i dehur në muajin janar të vitit 2021, sikurse del edhe në përgjimet e SKY ECC. Gjoshi, nga Shijaku, rezulton kunati i Altin Hajrit, pronarit të kompleksit “Golden” dhe i kërkuar për rrëmbimin dhe zhdukjen e Jani Prengës në vitin 2020.
Policia ka bërë shoqërime të shumta dhe marrje në pyetje të personave, kryesisht në cilësinë e dëshmitarëve. Viktima ka qenë me persona të tjerë në tavolinë duke drekuar, kur Gjoshi ka hyrë dhe e ka qëlluar direkt me armë disa herë.
Grupi hetimor po punon për të konfirmuar edhe një pistë zyrtare për ngjarjen, teksa dyshohet prishja e pazareve të drogës. Ka pasur edhe konflikte më të hershme mes tyre. Kontrollet janë përqendruar kryesisht në zonën e Shijakut, Durrësit dhe më gjerë.
Viktima jetonte kryesisht mes Italisë dhe Shqipërisë dhe mes dy personave ka pasur njohje të hershme. Dyshohet se autori mund të ketë pasur edhe një person ndihmës për largim nga vendngjarja, por pamjet e mundshme të kamerave të sigurisë mund të zbardhin detaje të tjera nga dinamika e krimit.
