Kreu i Grupit Parlamentar të PS-së, Taulant Balla, ka kërkuar përjashtimin e kreut të PD-së, Sali Berisha, për 30 ditë nga Kuvendi pas deklaratave të tij diskriminuese ndaj ambasadorit të BE në Shqipëri, Silvio Gonzato.
Balla theksoi se deklarata e Berishës përbën një incident diplomatik dhe shkelje të Kodit të Etikës së Kuvendit, duke përdorur “gjuhë që nxit urrejtjen” dhe duke i kërkuar PD-së të distancohet nga ajo që e quajti një deklaratë “turpshme”. Ai shtoi se PS i është drejtuar Komisionit të Etikës për marrjen e masave disiplinore.
Nga ana tjetër, Sali Berisha iu kundërpërgjigj Ballës, duke e quajtur gjithçka “shpifje”. Ai deklaroi se nuk ka fyer asnjë ambasador, por ka shprehur mendimet e tij lidhur me ligjin për barazinë gjinore. Berisha theksoi se direktivat e BE-së nuk përdorin terminologji të shumëfishtë gjinore, por mbeten brenda binaritetit burrë-grua. Ai përsëriti se është kundër çdo forme diskriminimi dhe pabarazie, si dhe kundër përpjekjeve për “ri-formim të antropologjisë gjinore”.