Shtylla e tretë e programit qeverisës “Rama 4”, e titulluar Mirëqenia për të gjithë, fokusohet te arsimi dhe mirëqenia sociale. Një nga objektivat kryesorë është rritja e pagës mesatare të mësuesve në 1250 euro deri në vitin 2029, ndërtimi i 200 shkollave të reja dhe ngritja e 1000 laboratorëve inteligjentë.
Programi përfshin gjithashtu dixhitalizimin e arsimit dhe testimeve, futjen e kurrikulave të reja me inteligjencë artificiale dhe integrimin e saj në procesin mësimor, si dhe zgjerimin e shërbimeve online. Do të ngrihet një agjenci e specializuar dhe e certifikuar sipas standardeve ndërkombëtare, që do të mundësojë njohjen automatike të diplomave.
Një tjetër prioritet është programi ushqimor dhe ai pas-shkollor në çdo bashki, si edhe krijimi i një shoqërie publike për transportin shkollor. Përmes saj, nxënësit dhe mësuesit që jetojnë larg institucioneve arsimore do të përfitojnë transport falas.
Qeveria synon gjithashtu dyfishimin e numrit të nxënësve në arsimin profesional, me investim prej 60 milionë eurosh për shkolla profesionale dhe laboratorë teknikë. Objektivi është që deri në vitin 2030, 35% e nxënësve të ndjekin arsimin profesional dhe të sigurohet që të gjithë të kenë konvikte sipas standardeve europiane.
Një tjetër risi është përfshirja e diasporës akademike në hartimin e politikave, mësimdhënie dhe kërkim shkencor, duke sjellë eksperiencat më të mira ndërkombëtare dhe duke krijuar ura bashkëpunimi me Shqipërinë.