Kreu i Komisionit Qendror të Zgjedhjeve, Ilirjan Celibashi, deklaroi sot se gjatë procesit zgjedhor të pjesshëm janë shfaqur vetëm dy problematika, konkretisht në Vlorë dhe Cërrik.
“Derisa procesi po zhvillohet normalisht, kemi raportuar për dy raste: një në Cërrik, ku dyshohet për sjelljen e një vëzhguesi që mund të ketë monitoruar votuesin; dhe një tjetër në Vlorë, ku ka pasur diskutime mes kryetares së qendrës së votimit dhe operatorit për procedurat e identifikimit. Po verifikojmë detajet për secilin rast,” tha Celibashi.
Ai shtoi se votimi do të mbyllet rreptësisht në orën 18:00 dhe askush nuk do të lejohet të votojë pas kësaj ore, përveç votuesve që ndodhen brenda qendrave në momentin e mbylljes.
Pjesëmarrja deri tani tregon një trend të ulët tek votuesit e rinj, ndërsa grupmosha që ka marrë më shumë pjesë është ajo mbi 65 vjeç, një tendencë e ngjashme edhe në shtete të tjera.