Nëse përdor Facebook ose Instagram dhe jeton në Europë, ke vetëm edhe pak kohë për të ndaluar Meta-n që të përdorë përmbajtjet e tua për të trajnuar inteligjencën artificiale.
Nga mesnata e 27 majit 2025, Meta do të fillojë të mbledhë të dhëna nga postimet publike – komente, foto, video, përshkrime – për të përmirësuar modelet e saj të AI-së. Mesazhet private, bisedat në WhatsApp dhe profilet e të miturve nuk përfshihen, por gjithçka tjetër që ke postuar publikisht mund të përdoret.
Si të ndalosh këtë proces?
Meta ofron mundësinë për kundërshtim, por duhet ta bësh vetë, përpara datës 27 maj. Ja si:
Në Facebook ose Instagram:
Shko te profili yt
Hape menunë me tre vija (☰)
Zgjidh Qendrën e Privatësisë (Privacy Center)
Gjej seksionin për kundërshtim të përdorimit të të dhënave
Plotëso formularin me email-in tënd
Konfirmo nëpërmjet email-it që do të marrësh
Nëse ka përmbajtje (foto apo komente) që janë postuar nga dikush tjetër dhe ku ti je i përfshirë, duhet të plotësosh një formular tjetër më të detajuar.
Kujdes: Rreziku nuk zhduket plotësisht
Edhe pas kundërshtimit, Meta mund të vazhdojë të përpunojë të dhënat që janë të publikuara nga të tjerë – si p.sh. kur emri yt përmendet në një koment apo kur shfaqesh në një foto të postuar nga një mik.
Kompania thotë se bazohet te “interesi legjitim” sipas ligjeve evropiane për të dhënat (GDPR), ndonëse kjo qasje po sfidohet nga organizata si NOYB, që ka ngritur ankesa në 11 vende të BE-së.