Familja Mbretërore Shqiptare është zgjeruar. Princ Leka II dhe Princesha Blerta janë bërë prindër të një djali, ndërsa lajmi është bërë publik përmes një njoftimi zyrtar të Oborrit Mbretëror Shqiptar dhe një fotografie familjare të ndarë nga vetë Princ Leka.
Sipas njoftimit, Lartësia e Tij Mbretërore, Princ Aleksandër i Shqiptarëve, erdhi në jetë paraditen e së premtes, më 10 korrik 2026, në orën 11:11, në Spitalin Universitar Obstetrik-Gjinekologjik “Mbretëresha Geraldinë” në Tiranë.
Princi Aleksandër lindi me peshë 3 kilogramë e 115 gramë, ndërsa si nëna, Princesha Blerta, ashtu edhe foshnja gëzojnë shëndet të plotë.
Në njoftimin zyrtar, Princ Leka dhe Princesha Blerta shprehin mirënjohjen e tyre ndaj ekipit mjekësor të maternitetit “Mbretëresha Geraldinë” për profesionalizmin, kujdesin dhe përkushtimin e treguar gjatë lindjes.
Lajmi është shoqëruar edhe me një foto të ngrohtë familjare, ku Princ Leka, Princesha Blerta dhe djali i tyre i porsalindur shfaqen së bashku, duke ndarë me publikun një nga momentet më të bukura të jetës së tyre.