Polonia ka aktivizuar një sistem të ri dhe të avancuar mbrojtjeje kundër dronëve, të porositur nga një konsorcium norvegjezo-polak, me synim rritjen e sigurisë së hapësirës ajrore ndaj kërcënimeve moderne.
Lajmi u bë i ditur nga qeveria polake, ndërsa ministri i Mbrojtjes, Wladyslaw Kosiniak-Kamysz, deklaroi gjatë nënshkrimit të kontratës se sistemi i quajtur “San”, i zhvilluar nga kompania norvegjeze Kongsberg në bashkëpunim me grupin polak të armatimeve PGZ, përbëhet nga 18 bateri dhe rreth 700 mjete mbështetëse.
Sipas mediave polake, vlera e marrëveshjes arrin në rreth 3.6 miliardë euro.
Kryeministri Donald Tusk e cilësoi këtë investim si një hap vendimtar drejt ndërtimit të një mbrojtjeje ajrore efektive dhe moderne. Ai rikujtoi një incident të ndodhur në shtator, kur dhjetëra dronë hynë në hapësirën ajrore të Polonisë gjatë një sulmi rus ndaj Ukrainës, duke detyruar Forcat Ajrore polake dhe aleatët e NATO-s të ndërhynin dhe të rrëzonin raketa për herë të parë.
Sipas kompanisë Kongsberg, sistemi “San” do të përfshijë një gamë të gjerë armësh dhe teknologjish, si mitralozë, raketa, dronë interceptues, si edhe pajisje për bllokim elektronik dhe sisteme radarësh për zbulimin e kërcënimeve ajrore.
Disa nga komponentët e sistemit bazohen në frëngji të vogla luftarake, të cilat mund të montohen si në mjete të blinduara me rrota, ashtu edhe në automjete terreni, duke rritur fleksibilitetin operacional.