ITALI– Policia italiane ka vënë në pranga një shqiptar në autostradën Napoli-Milano në Itali, pasi u kap me 11 kilogramë kokainë të fshehur në makinë.
Si rezultat i operacioneve, shqiptari u dërgua në burgun napolitan të Poggioreale, ndërkohë sipas vlerësimeve të autoriteteve, sasia e madhe e kokainës së sekuestruar, e hedhur në treg, do të kushtonte rreth një milion euro.
Operacioni i arrestimit të shtetasit shqiptar që po transportonte këtë sasi droge e cila kishte vlerën e 1 milion eurove, çoi në zbulimin e zinxhirit të furnizimit të organizatave kriminale në Napoli të Italisë.
Sekuestrimi i kësaj sasie të madhe droge përbën një goditje të rëndë për arkën e Camorrës, duke e privuar atë nga një burim i rëndësishëm financimi, shkruajnë mediat italiane.
Gjithashtu arrestimi i korrierit hap rrugë të reja hetimore që mund të çojnë në identifikimin e subjekteve të tjera të përfshira në trafikun e paligjshëm dhe të çmontojnë qeliza të tëra kriminale. Veprimtaria hetimore vijon ende dhe priten zhvillime të mëtejshme/.Cronachedellacampania