Ish-zëvendësdrejtori i Përgjithshëm i Agjencisë Kombëtare të Shoqërisë së Informacionit (AKSHI), Daniel Shima, u denoncua sot në polici si person i zhdukur nga familjarët e tij. Mësohet se kontakti i fundit me familjen ai e pati mesditën e kësaj të mërkure, duke u shprehur: “Po më arrestojnë”.
Pas këtij komunikimi, familjarët kontaktuan uniformat blu dhe mësuan se Daniel Shima nuk ishte ndaluar nga policia. Menjëherë pas këtij lajmi, ata bënë denoncimin zyrtar në Komisariatin Nr. 1. Policia ka nisur hetimet në dy pista: e para, ajo e rrëmbimit, dhe e dyta, e inskenimit të zhdukjes.
Daniel Shima nuk është emër i panjohur për mediat. Ai ishte përmendur nga ish-zëvendëskryeministri Arben Ahmetaj gjatë një intervistë në korrik 2024, kur flitej për përgjime ambientale të kapura nga SPAK mbi tendera në vlerën e 43 milionë eurove përmes AKSHI-t. Ahmetaj kishte deklaruar se Shima ishte kërcënuar për të heshtur lidhur me këto çështje.
Familjarët theksuan se kanë humbur kontaktet me Shima-n që prej paradites së sotme, ndërsa policia vijon kontrollet dhe hetimet për zbardhjen e rrethanave të zhdukjes.