Një natë argëtimi në Perugia përfundoi në tragjedi për 23-vjeçarin shqiptar Hekuran Cumani, i cili humbi jetën pasi u godit me thikë gjatë një përleshjeje mes të rinjsh në parkingun pranë Departamentit të Matematikës dhe Shkencave Kompjuterike.
Sipas hetimeve paraprake, Hekurani është sulmues për të mbrojtur të vëllanë gjatë një konflikti të dhunshëm që shpërtheu pas daljes nga një klub nate. Ai u qëllua në gjoks dhe ra në tokë i plagosur rëndë, ndërsa mjekët e urgjencës që mbërritën menjëherë nuk mundën ta shpëtonin.
Vëllai i Hekuranit, i cili mbeti i plagosur në incident, ka deklaruar se nuk e pa kush e qëlloi vëllain e tij, ndërsa dëshmitarët e tjerë kanë dhënë versione të paqarta e kontradiktore, çka ka bërë që hetuesit të dyshojnë për një “mur heshtjeje” mes të pranishmëve.
Përleshja, sipas policisë, ndodhi pas një nate në klubin “100dieci”, ku dy grupe të rinjsh – shumica të gjeneratës së dytë italiane me origjinë të huaj – u konfliktuan për arsye ende të paqarta.
Deri tani, disa persona janë vënë nën hetim, përfshirë një 18-vjeçar me origjinë marokene, që akuzohet për kërcënime të rënda dhe mbajtje të armës së ftohtë. Thika me të cilën dyshohet se u krye krimi, sipas policisë, u soll në vendngjarje nga e dashura e tij, e cila ndodhet gjithashtu nën hetim. Një tjetër 19-vjeçar me origjinë tuniziane përballet me të njëjtat akuza.
Në dosje figuron edhe një roje sigurie e klubit, që dyshohet se plagosi aksidentalisht vëllain e viktimës teksa përpiqej të ndante sherrin. Ai ka pohuar para hetuesve se kishte çarmatosur një nga të rinjtë që mbante thikë dhe se arma më pas ishte hedhur në një makinë që u largua me shpejtësi.
Policia ka sekuestruar telefonat e të dyshuarve dhe po analizon mesazhet dhe thirrjet e tyre për të rindërtuar kronologjinë e ngjarjes, pasi kamerat e sigurisë në zonë nuk kanë arritur të japin pamje të qarta.
Hetuesit pranojnë se ende nuk kanë identifikuar autorin e vrasjes, ndërsa vijon puna për të zbardhur plotësisht rrethanat e ngjarjes që i mori jetën 23-vjeçarit shqiptar, i përshkruar nga të afërmit si “një djalë i qetë, me zemër të madhe dhe larg problemeve”.