Policia e Korçës ka zbardhur plotësisht ngjarjen e ndodhur më 15 gusht në fshatin Mollaj, ku një 28-vjeçar mbeti i plagosur rëndë me thikë nga një 41-vjeçar.
Sipas hetimeve, pas plagosjes, katër persona ndërhynë për të ndihmuar të riun dhe sulmuan autorin e dyshuar, duke e goditur me grushta dhe shkaktuar plagë në kokë e trup.
41-vjeçari A. Q., banues në Mollaj, u arrestua për veprat penale “Vrasje me dashje” e mbetur në tentativë, “Dëmtime të tjera me dashje” dhe “Prodhimi, mbajtja, blerja apo shitja pa leje e armëve të ftohta”. Ai ndodhet në spital jashtë rrezikut për jetën.
Në pranga ranë edhe katër shtetas të tjerë: I. D. (45 vjeç), Th. P. (47 vjeç), Dh. K. (47 vjeç) dhe B. S. (33 vjeç), të akuzuar për “Plagosje të rëndë me dashje” në bashkëpunim.
Nga vendngjarja u sekuestruan thika e përdorur, një aparat celular dhe pamjet filmike që ndihmuan në zbardhjen e dinamikës.
Materialet procedurale i janë referuar Prokurorisë së Korçës për veprime të mëtejshme.