Kryetari i Bashkisë Lezhë, Pjerin Ndreu, ka reaguar fuqishëm ndaj shkeljeve dhe abuzimeve që po ndodhin në plazhet publike të rajonit. Ai paralajmëroi masa të ashpra kundër zaptuesve dhe atyre që abuzojnë me hapësirat dhe tarifat në plazhe.
Në një postim në rrjetet sociale, Ndreu bëri me dije se është zhvilluar një aksion i gjerë për lirimin e hapësirave publike të zëna në mënyrë të paligjshme, për heqjen e devijacioneve të paautorizuara, si dhe për kontrollin e çmimeve të parkingjeve dhe çadrave.
“Super aksion për çlirimin e devijacioneve të papërgjegjshme, zaptimin e hapësirave publike dhe çmimet e larta të parkingjeve. Do ketë sekuestrim, gjoba dhe paralajmërime për të gjithë abuzuesit! Nuk do të ketë kompromis me askënd,” shkroi Ndreu.
Ai kërkoi nga qytetarët të denoncojnë nëse parkingjet ofrohen me më shumë se 200 lekë dhe çadrat me më shumë se 500 lekë në Ranë të Hedhun, 400 lekë në Shëngjin-Kune dhe 300 lekë në Tale.
“Nuk përgjigjemi për tarifat e stacioneve hoteliere që aplikojnë çmime më të larta. Bëhet fjalë vetëm për plazhet publike, të cilat duhet të jenë të hapura dhe të qarta për të gjithë,” përfundoi Ndreu.