Ministri i Shtetit për Marrëdhëniet me Parlamentin, Toni Gogu, ka komentuar në emisionin “Top Story” vendimin e Gjykatës Kushtetuese për pezullimin e zgjedhjeve në Tiranë, duke theksuar se Partia Socialiste mbetet e përgatitur dhe e vendosur të vijojë fushatën e saj.
“Ai ishte një vendim që merret nga organet që organizojnë zgjedhjet. PS është garuese, jo organizatore e procesit. Presidenti cakton datën, ndërsa Gjykata Kushtetuese e shqyrton më pas. Ne si parti kemi respektuar ligjin që ditën e parë dhe nuk komentojmë vendimet e gjykatave, veçanërisht të Gjykatës Kushtetuese”, u shpreh Gogu.
Ai theksoi se vendimi nuk ndikon në aktivitetin e shtabit elektoral të PS-së në Tiranë:
“Kjo nuk ndryshon asgjë për ne. Jemi në komunikim të vazhdueshëm me qytetarët e Tiranës dhe po vijojmë diskutimin për mënyrën si do të përmirësojmë shërbimet publike, hapësirat dhe cilësinë e jetës në qytet. Patjetër që do të ketë një ditë zgjedhjesh, por puna jonë nuk ndalet.”
Në përfundim, ministri nënvizoi se PS mbetet e angazhuar “të respektojë ligjin dhe t’i përgjigjet qytetarëve 24 orë në ditë, sepse Tirana duhet të ruajë pulsin e saj të jetës.”