Së fundmi është zbuluar infektimi i parë i një njeriu nga gripi i shpendëve në Meksikë.
Mediat e huaja raportojnë se bëhet fjalë për një vajzë 3-vjeçare, e cila aktualisht ndodhet e shtruar në spital e deri më tani gjendja e saj shëndetësore raportohet të jetë e rëndë.
Infektimi te e mitura në fjalë mësohet se u zbulua më datë 1 prill, ndërsa autoritetet vendase kanë njoftuar menjëherë Organizatën Botërore e Shëndetësisë (OBSH).
Vdekjet që mund të ndodhin nga gripi i shpendëve nuk janë të papritura, pasi që nga viti 2003, ka pasur më shumë se 950 infeksione të konfirmuara të gripit të shpendëve në shkallë globale, dhe më shumë se 460 prej tyre kanë vdekur.
H5N1 është forma më e zakonshme e gripit të shpendëve. Thuhet se është vdekjeprurëse për zogjtë dhe mund të prekë lehtësisht njerëzit dhe kafshët e tjera që vijnë në kontakt me një transportues të saj.