Ka përfunduar procesi i rinumërimit të kutive të votimit për zgjedhjet e 11 majit në qarkun e Fierit. Kandidatja e njohur socialiste, Zegjine Çaushi, ka humbur mandatin deputetes me një diferencë të ngushtë prej 10 votash ndaj rivales së saj, Maldrita Bardho.
Në përfundim të numërimit fillestar, Çaushi kryesonte me 64 vota më shumë se Bardho. Por pas rinumërimit, asaj iu hoqën 48 vota që rezultuan të pavlefshme, ndërsa Bardhos iu shtuan 26 vota, duke përmbysur rezultatin përfundimtar në favor të saj.
Kësisoj, Bardho siguroi mandatin me një diferencë minimale, duke shmangur një përballje të shumëpritur mes Çaushit dhe Gazment Bardhit në Kuvend. Dy kandidatët kanë shkëmbyer akuza dhe sulme politike që prej fillimit të fushatës.
Rinumërimi në Fier u kërkua nga koalicioni “Nisma Shqipëria Bëhet” i drejtuar nga Adriatik Lapaj, i cili synonte të siguronte një mandat përmes rishikimit të rezultatit, por tentativa për t’ia marrë mandatin Partisë Socialiste rezultoi e pasuksesshme.
Shifrat sipas KQZ:
Maldrita Bardho
Vota preferenciale: 3616
Vota nga Diaspora: 1020
4636 vota në total
Zegjine Caushi
Vota preferenciale: 4026
Vota nga Diaspora: 600
4626 vota në total