Partia Demokratike organizon sot protestën kombëtare përballë Kryeministrisë, e cila pritet të nisë në orën 17:00.
Rreth 1350 efektivë policie do të angazhohen për mbarëvajtjen e tubimit. Policia e Shtetit ka bërë publike që një ditë më parë planin e detajuar të masave të sigurisë dhe kufizimeve të qarkullimit në kryeqytet.
Sipas njoftimit zyrtar, nga ora 13:45 e ditës së sotme do të ndalohet qarkullimi dhe parkimi i automjeteve në bulevardin “Dëshmorët e Kombit”, nga zona e njohur si “Ura e Dajtit” deri te rruga “Ismail Qemali”, deri në përfundim të protestës.
Po ashtu, nga ora 15:00 dhe deri në mbylljen e tubimit, do të bllokohet lëvizja e automjeteve në segmentin e bulevardit “Dëshmorët e Kombit”, nga kryqëzimi pranë Ministrisë së Brendshme deri në sheshin “Nënë Tereza”, si edhe në rrugët “Ukraina e Lirë”, “Papa Gjon Pali II” dhe “Ismail Qemali”.
Në të njëjtën kohë, Policia e Shtetit u ka bërë thirrje qytetarëve të tregojnë kujdes dhe të distancohen nga çdo veprim i kundërligjshëm që mund të cenojë rendin dhe sigurinë publike gjatë zhvillimit të protestës.