Kreu i Partisë Mundësia, Agron Shehaj, ka deklaruar publikisht mbështetjen për kandidaturën e Florian Binajt në zgjedhjet e pjesshme të 9 nëntorit për Bashkinë e Tiranës edhe pse më herët ishte shprehur kundër. I ftuar në emisionin “Opinion”, Shehaj theksoi se, pavarësisht zhgënjimit me Partinë Demokratike gjatë procesit të përzgjedhjes së kandidatit, qëllimi kryesor mbetet fitorja ndaj korrupsionit në kryeqytet.
Shehaj tregoi se fillimisht Partia Mundësia kishte propozuar Ermal Hasimen si kandidat të përbashkët të opozitës, propozim që sipas tij u prit me entuziazëm, por më pas PD ndryshoi qëndrim:
“Fatkeqësisht i gjithë ky proces u mbyll në mënyrën më të keqe të mundshme. PD na preu në besë sepse na tha ‘hajde ulemi se propozimi është i mirë’ dhe në fund veproi ndryshe.”
Megjithatë, Shehaj nënvizoi se mbështetja për Binajn do të jetë pa kushte:
“Ne do mbështesim kandidatin jo politik dhe do ta mbështesim Florian Binajn sikur ta kishim propozuar vetë. Qëllimi është që t’i japim Tiranës një kryebashkiak të pa korruptuar.”
Shehaj shtoi se Partia Mundësia është e gatshme të angazhohet në fushatë në çdo formë që Binaj e sheh të arsyeshme:
“Që nesër jemi të gatshëm të ulemi dhe të diskutojmë si e mendon ai fushatën. Unë mendoj se kjo fushatë nuk duhet të jetë tradicionale me kryetarët e partive në krah, por me qytetarët. Jam i bindur që formula që kemi zgjedhur është fituese.”
Deklarata e Shehajt vjen në një moment vendimtar për opozitën, që kërkon të garojë e bashkuar në zgjedhjet e Tiranës, me një kandidat të pavarur dhe me profil qytetar.