Koalicioni Partia Demokratike – Aleanca për Shqipërinë Madhështore (PD–ASHM) i ka dërguar Komisionit Qendror të Zgjedhjeve një kërkesë zyrtare për të marrë në mënyrë urgjente të gjitha provat dhe dokumentacionin lidhur me certifikimin e rezultateve në qarqet ku janë miratuar tabelat përfundimtare.
Në kërkesën e saj, PD–ASHM kërkon në veçanti:
Raportin e kryqëzimit të të dhënave të Platformës Elektronike të Identifikimit (PEI) për të gjitha Qendrat e Votimit në çdo qark dhe zonë zgjedhore.
Dokumentacionin që vërteton marrjen personale të zarfeve me materialet zgjedhore nga çdo votues në Diasporë, përfshirë edhe regjistrin e nënshkruar nga votuesit, ose në rast mosdërgimi, dokumentacionin e kthimit të zarfeve nga DHL në KQZ.
Raportin e auditimit teknik për çështjet që lidhen me listat e zgjedhësve në çdo qark dhe zonë zgjedhore.
Kopje të regjistrave të posaçëm të secilës Qendër Votimi në qarqet përkatëse.
Kopje të të gjitha proces-verbaleve të secilës QV dhe KZAZ në çdo qark dhe zonë zgjedhore.
Kjo kërkesë vjen në kuadër të ushtrimit të të drejtës për ankimin e vendimeve të KQZ-së për miratimin e rezultateve, teksa PD kërkon transparencë të plotë dhe qartësi për procesin e certifikimit.