Kolegji i Posaçëm i Apelimit (KPA) ka vendosur sot të konfirmojë në detyrë gjyqtarin Laurent Fuçia dhe prokurorët Julian Xhengo e Juljan Çafka, pasi këta të fundit përfunduan me sukses programin e trajnimit në Shkollën e Magjistraturës.
Tre magjistratët u dërguan për trajnim njëvjeçar pas evidentimit të problematikave në kriterin e aftësive profesionale gjatë procesit të rivlerësimit (vetting-ut). Pas përfundimit të trajnimit dhe marrjes së rezultateve përfundimtare, trupi gjykues i KPA-së – i përbërë nga Ina Rama (kryesuese), Rezarta Schuetz (relatore), Mimoza Tasi, Natasha Mulaj dhe Sokol Çomo – vendosi konfirmimin e tyre në detyrë.
Vendimi bazohet në ligjin “Për rivlerësimin kalimtar të gjyqtarëve dhe prokurorëve në Republikën e Shqipërisë”, duke mbyllur kështu një proces monitorimi dhe formimi profesional që synon rritjen e standardeve në sistemin e drejtësisë.