Pas më shumë se katër vitesh pezullim për shkak të luftës në Ukrainë, Rusia do të marrë pjesë sërish në një aktivitet zyrtar të organizuar nga FIFA. Bëhet fjalë për përfaqësuesen U-15, e cila është ftuar të garojë në Kupën dhe Festivalin Botëror U-15, që do të zhvillohet në Azerbajxhan nga 22 deri më 31 tetor 2026.
Sipas raportimit ekskluziv të L’Équipe, kjo është hera e parë që një ekip rus do të marrë pjesë në një turne zyrtar të FIFA-s që nga përjashtimi i Rusisë nga të gjitha garat ndërkombëtare në vitin 2022, pas nisjes së luftës në Ukrainë.
Ky vendim konsiderohet si hapi i parë drejt rikthimit gradual të futbollit rus në skenën ndërkombëtare. Megjithatë, rikthimi aktual i referohet vetëm ekipit U-15 dhe nuk nënkupton heqjen e plotë të sanksioneve ndaj ekipeve kombëtare të të rriturve apo klubeve ruse.
Rusia, organizatore e Kupës së Botës 2018, u përjashtua nga të gjitha kompeticionet e FIFA-s dhe UEFA-s në vitin 2022. Që prej asaj kohe, ekipet kombëtare dhe klubet ruse kanë zhvilluar vetëm ndeshje miqësore dhe aktivitete brenda vendit.
Ftesa për turneun në Azerbajxhan është bërë nga autoritetet përkatëse të FIFA-s dhe pritet të jetë nën vëmendje të madhe të opinionit sportiv ndërkombëtar. Rikthimi i ekipit rus ka ngjallur reagime të ndryshme, pasi shihet si një sinjal i mundshëm për riintegrimin gradual të federatës ruse në futbollin botëror.
Më herët, presidenti i FIFA-s, Gianni Infantino, kishte shprehur mbështetjen për rikthimin e ekipeve të moshave të Rusisë si një hap drejt normalizimit të pjesëmarrjes së saj në garat ndërkombëtare.
Turneu U-15, që do të mbahet në Azerbajxhan gjatë muajit tetor, pritet të shënojë rikthimin e parë zyrtar të një përfaqësueseje ruse në një kompeticion të FIFA-s pas izolimit sportiv që zgjati më shumë se katër vjet.