Pas një situate të tensionuar në Komisionin Zonal të Administrimit të Zgjedhjeve nr. 40 në Tiranë, është marrë një vendim përfundimtar në lidhje me kontestimin e Partisë “Mundësia”. Komisioni vendosi të shpallë të vlefshme të gjitha votat e kontestuara që fillimisht ishin cilësuar si të pavlefshme për shkak të diferencave në ngjyrën e fletës së votimit.
Partia “Mundësia” kishte denoncuar publikisht se shtatë vota të saj ishin shpallur të pavlefshme pa një arsye të qartë. Kreu i partisë, Agron Shehaj, e cilësoi situatën si një përpjekje për t’i mohuar votat që mund t’i siguronin forcës së tij politike mandatin e dytë në qarkun e Tiranës.
Pas shqyrtimit të ankesës, KZAZ nr. 40 vendosi në favor të Partisë “Mundësia”, duke e konsideruar të pabazuar pavlefshmërinë e mëparshme të fletëve.
Ky vendim përbën një fitore të rëndësishme procedurale për “Mundësinë”, e cila ndodhet shumë pranë sigurimit të një mandati të dytë në Tiranë sipas të dhënave të deritanishme.